Öryggisfjarskipti ehf. var stofnað síðla árs 2006 og var verkefni félagsins í upphafi að byggja upp og reka fullkomið Tetra fjarskiptakerfi fyrir öryggis- og neyðarþjónustu um land allt. Félagið er í eigu ríkissjóðs og Neyðarlínunnar ohf. 

Tetra talstöðvarkerfið er öflugt miðstýrt hópfjarskiptakerfi sem stofnanir, fyrirtæki og félagasamtök eða einstaklingar geta nýtt sér sem stjórntæki fyrir hröð og örugg samskipti milli einstaklinga og hópa ásamt flotastjórnun eða eftirliti með hjálp ferlivöktunar.

Tilgangur félagsins er jafnframt uppbygging og rekstur mannvirkja og öruggra kerfa, aðallega fyrir neyðar- og öryggisfjarskipti fyrir viðbragðsaðila, orkufyrirtæki og veitur, samgöngur og fleiri aðila sem reka þjóðfélagslega mikilvæga innviði. Einnig fyrir öryggi almennings á landi og sjófarenda til að tryggja að sem víðast verði hægt að kalla eftir hjálp í neyð. 

Starfsemi Öryggisfjarskipta nær til landsins alls og samanstendur meðal annars af sendastöðum fyrir ýmis fjarskipti, ljósleiðarakerfa, Tetra kerfinu og kerfum vaktstöðvar siglinga. Neyðarlínan sem á hlut í félaginu leigir meginhluta eigna Öryggisfjarskipta, annast daglegan rekstur þeirra og sölu á þjónustu til notenda þeirrar þjónustu sem veitt er um eignir félagsins. Einnig sinnir félagið öðrum tilfallandi sérverkefnum.  

Öryggisfjarskipti ehf. er til húsa í Björgunarmiðstöðinni Skógarhlíð 14. 